Como recoñecer a unha bruxa

Onte comezamos a elaborar carteis anunciando "Como recoñecer a unha bruxa verdadeira", seguindo a valiosa información de Roald Dahl en As bruxas e as aprendendo as pautas básicas para o deseño de carteis e anuncios. Para elaboralos estamos a empregar a letra que usaba Castelao,  que nas fontes informáticas podemos atopar como Gallaecia.

Onte, 29 de xaneiro, foi o aniversario do nacemento de Castelao (29 de xaneiro de 1886) e hoxe, 30 de xaneiro celébrase o Día da Ilustración, adicado este ano á ilustradora Lolita Díaz Baliño.

Lego Boost

Na biblioteca Diego e Saúl estiveron a fedellar cun dos novos recursos do Espazo Argalleiro. Lego e robótica, boa combinación! Seguiremos fedellando e aprendendo.

Cores

En Plástica estamos traballando sobre a cor, lembrando como conseguilas.E de paso dándolle unha segunda vida aos ventiladores dos ordenadores vellos 😉

Aí, ai, hai.

A ver se co Dígocho eu de Esther Estévez queda máis claro 😀

 

As bruxas

Comezamos a lectura dun novo título do noso itinerario lector: As bruxas de Roald Dahl, ilustrado por Quentin Blake.

Aínda acabamos de comezar pero xa sabemos que nos vai ser de moita utilidade para identificar e poñernos a salvo das bruxas verdadeiras...

Temos entre mans un dos clásicos imprescincibles da literatura infantil escrito por un dos mellores autores de historias para rapaces e rapazas de todos os tempos. 

A ler e a gozar!!!

 

Aniversario de Rita

Hoxe Rita cumpriu 12 anos! 🎉🎉 Unha moza!

Este curso pouco podemos celebrar no cole, pero cantámoslle no patio, démoslle os parabéns e sacamos foto de grupo. O Sol quentaba e acompañounos. 

MOITOS PARABÉNS, RITA!🎈🎈🎈

Marea Negra

 

 Esta é a montaxe que elaboramos na clase de Valores. Está baseada no conto Marea Negra, de Pepe Carreiro, sobre o desastre do Prestige. Escribimos os diálogos, gravámolos, preparamos os decorados, e sacamos máis de 400 fotografías para poder editar despois en Stop Motion. Esperamos que vos guste!

Mércores: imos á biblio!

 

"Folerpas de neve"

Neste tempo frío chegounos outra "folerpa de neve". A cabra branca coa que estivemos venres pariu esta noite unha cabuxiña branca con manchas negras 😍😍😍😍

Xa son 22 no rabaño! Benvida!

Moito máis ca leña!

O proxecto Máis ca leña da Comunidade de Montes o Fieitoso e o colectivo veciñal Fousas ao Monte continúa avanzando a bo ritmo e empeza o 2021 con novidades e melloras. 

Este venres, aproveitando o día frío, pero seco e solleiro,  fomos ver de primeira man as novas instalacións que se acondicionaron para as cabras recén paridas e as súas crías. Vaaale, realmente fomos coñecer as novas crías e saúdar ás súas nais 😍

De lado do cole comprobamos que hai crías en camiño. A cabuxa branca está preñada e non ha tardar en darnos máis alegrías. 

Comezamos o 2021 con 21 cabuxas no rabaño, non está nada mal!!!