Obradoiro de radio: edición

Na segunda sesión do obradoiro de radio estivemos coñecendo e practicando a edición de audios co programa Audacity, que temos nos nosos ordenadores Edixgal. Descubrimos un mundo de posibilidades!

Obradoiro de radio: locución

Este xoves participamos nun obradoiro de radio coordinado pola BBS e impartido por membros do colectivo Ponte nas Ondas. Comezamos a mañá con Damián, aprendendo como mellorar a nosa locución cando estamos a gravar ou a emitir un programa de radio.

Río Navia

 Lucía presentounos o río Navia, un dos máis importantes da vertente cantábrica. Seguimos aprendendo cos vosos traballos 😃

Sementeira de castañas

Rematamos o magosto saíndo a Campo Maneiro a sementar as castañas que xa viñan con gromo. Fomos pola parte de abaixo das pistas, para completar a plantación de árbores autóctonas que fixeramos hai anos e despois fomos ver as árbores que plantamos o curso pasado. Saudamos a Maria Luisa, como non? 😁 E lembrámonos de Alex. 😢

Magosto 2020

Foi diferente aos magostos do Brea Segade: non estivemos tod@s xunt@s, non houbo xogos conxuntos no patio, nin puidemos pintar as caras con chamusco, pero si comemos castañas e botámonos unhas risas.

As castañas estaban ben boas! 

Coma todos os anos, grazas a Charo e Tino por asalas para todo o cole.

Mochilas Viaxeiras

2ª viaxe das Mochilas Viaxeiras de 6º. 

Boas lecturas, Abel e Diego!

Río Xallas

Rafa presentounos o seu traballo sobre o río Xallas, que desemboca na fermosísima fervenza do Ézaro.

Reto: lectura de escritoras

Esta semana a BBS propúxonos un reto, a lectura dun mínimo de seis obras de escritoras galegas entre novembro e marzo. Cada obra que leamos temos que incluíla nun Pase de Lecturas que recibimos esta semana, e a comezos de marzo, coincidindo co Día da Muller, quen teña o pase completo recibirá un agasallo da BBS. Esta proposta pretende enlazar as conmemoracións do Día das Escritoras e o Día da Muller e dar a coñecer a obra de escritoras galegas de literatura infantil e xuvenil. 

Ponémonos mans...aos libros!

Río Eo

Comezamos as presentacións dos traballos sobre os ríos de Galicia que estamos facendo en Sociais.A primeira foi Nerea, falándonos do río Eo. Canto imos aprender!

Axudantes BBS 2019-2020

Hoxe nada máis chegar ao cole tiñamos unha sorpresa: os agasallos da Asesoría de Bibliotecas Escolares para os Axudantes da BBS do curso pasado, que eran case toda a clase! Non puideron mandalos en xuño e xa non os agardabamos, así que hoxe foi unha boa sorpresa.  Temos un diploma, unha mochila e un caderno para anotar... posibles lecturas ou o que nós queiramos. Grazas!

Samaín 2020

É tempo de Samaín!

Non puidemos celebrar como todos os anos. Botamos en falla o tunel do terror na entrada, os obradoiros e xogos con todas as clases do cole, as larpeiradas, a exposición de cabazas... Pero non faltaron os disfraces, o bo humor e o traballo en torno ao Samaín, que este ano, necesariamente, ten que celebrarse na casa. 

Estes son os nosos deseños partindo da película Pesadelo antes de Nadal de Tim Burton.